Sot u mbajt prezantimi i pilot-projektit të shkëmbyesit të nxehtësisë, i implementuar nga Shoqata e Përpunuesve të Pemëve dhe Perimeve të Kosovës (PePeKo) në kompaninë GRASEP.
Ky projekt pilot synon të promovojë përdorimin e teknologjive inovative për rritjen e efikasitetit energjetik në industrinë agro-përpunuese, duke mundësuar rikuperimin dhe ripërdorimin e energjisë termike gjatë proceseve të prodhimit. Përmes këtij sistemi, kompania synon të zvogëlojë konsumin e energjisë, të ulë kostot operative dhe të përmirësojë performancën e përgjithshme të proceseve të saj prodhuese.
Gjatë prezantimit, pjesëmarrësit patën mundësinë të njihen nga afër me funksionimin e shkëmbyesit të nxehtësisë, përfitimet teknike dhe ekonomike të sistemit, si dhe ndikimin pozitiv që teknologji të tilla mund të kenë në rritjen e qëndrueshmërisë së sektorit të përpunimit të ushqimit në Kosovë.
Përfaqësues të sektorit privat, institucioneve dhe organizatave të ndryshme diskutuan mbi rëndësinë e investimeve në teknologji moderne dhe zgjidhje që kontribuojnë në kursimin e energjisë, uljen e emetimeve dhe përmirësimin e konkurrueshmërisë së ndërmarrjeve vendore.
Ky pilot-projekt paraqet një shembull konkret të aplikimit të praktikave inovative në sektorin agro-përpunues dhe demonstron potencialin që kanë teknologjitë e efiçiencës energjetike për të mbështetur zhvillimin e qëndrueshëm të industrisë ushqimore në Kosovë.
Pritet që përvojat dhe rezultatet e këtij projekti të shërbejnë si model për kompanitë e tjera të sektorit, duke nxitur investime të mëtejshme në zgjidhje të qëndrueshme dhe teknologji që përmirësojnë performancën ekonomike dhe mjedisore të bizneseve agro-përpunuese.
