Në një vizitë të realizuar nga AgroDev në kompaninë Euro Tac në Mamushë, u pa nga afër se si investimi në cilësi dhe standarde po përkthehet në rezultate konkrete në treg.
Vetëm gjatë këtij sezoni, kompania ka eksportuar rreth 80 kamionë me produkte të freskëta bujqësore në 6 shtete të ndryshme, duke përfshirë domate, domate rozë, domatina, tranguj dhe tranguj kornishon. Kjo është një dëshmi e qartë se prodhimet e Kosovës po fitojnë gjithnjë e më shumë besimin e blerësve ndërkombëtarë.
Një nga kushtet kryesore për eksportin e produkteve në tregun evropian është certifikimi sipas standardit GlobalG.A.P.
GlobalG.A.P. është një standard ndërkombëtar i njohur për praktikat e mira bujqësore, i cili siguron që produktet bujqësore të prodhohen në mënyrë të sigurt, të qëndrueshme dhe të gjurmueshme. Certifikimi mbulon aspekte të rëndësishme si siguria ushqimore, mbrojtja e mjedisit, shëndeti dhe mirëqenia e punëtorëve, si dhe përdorimi i përgjegjshëm i inputeve bujqësore.
Gjatë takimit, përfaqësuesit e Euro Tac theksuan rëndësinë e certifikimit GlobalG.A.P., për të cilin kanë përfituar mbështetje nga AgroDev dhe komunës së Mamushës. Sipas tyre, përmbushja e këtij standardi ndërkombëtar ka qenë një hap i rëndësishëm drejt zgjerimit të eksporteve, pasi ka rritur besueshmërinë e kompanisë dhe ka hapur mundësi për bashkëpunim me më shumë partnerë ndërkombëtarë.
Përvoja e Euro Tac dëshmon se certifikimi nuk është vetëm një dokument formal, por një investim që rrit konkurrueshmërinë, krijon besim te blerësit dhe ndihmon bizneset të depërtojnë në tregje të reja.
AgroDev vazhdon të mbështesë bizneset bujqësore në përmbushjen e standardeve ndërkombëtare, me synimin që gjithnjë e më shumë prodhime vendore të arrijnë në tregjet evropiane dhe më gjerë, duke krijuar vlerë të shtuar për sektorin bujqësor dhe ekonominë e Kosovës.
